Leigubílar

Ég tek stundum leigubíl. Frekar oft undanfarið því ég er iðulega ekki búin að vinna fyrr en strætó er hættur að ganga og það er svo mikið myrkur úti á kvöldin og það tekur mig 40 mínútur að labba heim og Hrafnista borgar ef maður fer svona seint heim og þess vegna tek ég leigubíl. Tek líka stundum leigubíl í vinnuna ef ég er sein eða það er mikill snjór úti. Það er ótrúlegt hvað leigubílstjórar eru sumir hverjir óforskammaðir. Sumir eru ægilega fínir, þeir eru mjög misjafnir, en sumir eru...  Ég bíð yfirleitt við dyrnar þegar þeir mæta og hleyp strax út. Samt virðist þeim einhvern vegin hafa takast að koma mælinum upp í 550 kall áður en ég er komin inn í bíl. Startgjaldið er 490 hef ég tekið eftir hjá þessum góðu. Það er eins og þeir kveiki á mælinum á leiðinni inn bílastæðið. Svo er alveg ótrúlega misjafnt hvaða leið þeir taka. Ég er að borga allt frá 890 kr upp í 1200 kr fyrir sömu ferðina, á sama taxta! En það sló nú einn allt út um daginn! Hann slökkti á mælinum á leið inn bílastæðið heima því það var komið í sléttar 1000 kr. (Hefði kannski átt tíkall eftir). En svo spurði hann "ætlarðu kannski að láta skrifa þetta?" "Ehh já." "Nú! Þá kveiki ég aftur!!!!!" Svo kveikti kallinn bara aftur á mælinum meðan hann dundaði sér við að skrifa þá ítarlegustu kvittun sem nokkur leigubílsstjóri hefur skrifað að mér vitandi, rétti mér þetta svo til að skrifa undir og þá loksins slökkti hann, í 1130 kr!!!!! Mér fannst þetta nú frekar mikið lélegt! Hvað kemur það honum við hver borgar ferðina.. Usss! En þessir gæjar eru nú margir að græða um 20-100 kr bara á því að kveikja ógurlega snemma á mælinum. Og það safnast nú saman yfir daginn! Er ekki einhver regla sem segir að þeir eigi ekki að kveikja fyrr en fólk er komið að eða inn í bílinn?! Kyle segir að þegar hann tekur bíl í útlöndunum þá biður hann þá alltaf um að núllstilla mælinn ef þeir eru búnir að starta honum og ef þeir neita þá labbar hann út og pantar annan. Ohh ætli maður yrði ekki bara settur á svarta listann hjá leigubílunum ef maður reyndi eitthvað svoleiðis...